Kopfbild 720x124

Herzlichs Grüaß Gott

Herzlichs Grüaß Gott en Bada-Würddaberg

Sieba Freilichtmusea onder freiam Hemmel geid’s en unsra Gegend, also en Bada-Würddaberg. Do erfersch elles aus am Leba, vom Schaffa ond wia sema bei ons gläbd hend. Do muascht obedengt vorbeigugga. Do wirschglotza ond schdauna bei ons em Freilichtmuseom em Kreis Esslenga A scheene Landschaft midda en Bada-Würddaberg glei bei Schduagerd(Stuttgart) isch s drzua no.

Nomol herzlich Grüaß Gott em Freichlichtmuseom Beura!

Komm gugg und schdaun über onser Sach und über des was mr gschpart ond zemaghalda hend.
Bei ons goht’s emmer zua wia auf dr Kirbe. Do derfsch et bloss so herfahre ond dia 20 Baura-ond Wohnheisr vom Neckar ond dr Alb blos agugga. Noi da muaschd au Deine Kender ond Oma mitbrenga, oifach mit Kend ond Kegel komma und mitmacha bei de Feschdla. Weil da gibt’s emmer abbas Guats für da Maga ond fürs Gmüat. Entweder en dr gmüatliche Wirtschaft oder onderm Birabohm em Garda.

Deine Kender werdat schdrahle ond Glotzböbbel aufschberra ond dia werdet no ihre Kender schbäder davo erzähla. Von de Henna, Hasa, Schoof ond Goisa ond nadürlich vom Dande-Emma-Lada wia früer bei der Nochberre and der Eck wo’s ellas gebba hod. Jo sogar no Bomboo aus denne dicke Bomboogläser direkt end Hend.

Dia mehr als 20 Museomshäuser zoigad Dir von denne Leid dia do früer glebt ond gschaffd hend. Ausser Bauraheiser, Schdäll ond Scheura send Wohnonga ond Wergschdädda von de Handwerker mit ihre Familia, also dr heidiga Middelschicht. Au a Haus vom a Webr mit Webrdonk von dr Alb ra isch drbei, au a Baurahaus mitdra ganza Schreinerei, a für de domolig Zeit a ganz moderns Fotoatelier ond no a Kalkofa ond a Haus vom Schuldes mit dr Lehrerwohnung. Jedes Haus kosch selber ganz alloi agugga.

Em Museomsbackhäusle wird emmer wieder backa. Der Backofa wird wia früer mit Holz gschürt. Was glaubsch wia dia süsse Schtückla , dia Dätscher ond’s Brod an so am a Dag dir guad schmeggad.

Mr machad viel für d’ Kender. Oschderoierfärba, (Odstereier färben), backa em Häusle, filza mit Schoofswolla, herrichda vom Flachs ond Leina, ond ganz alde schbannende Kenderschpial send a pfondiga Sach. So gibt’s füer Kender ond Eltra ganz bsondere Däg wia dSchäferdäg wo mr ellas übr dWolle mitkriagt ond übr dSchoof ond dSchäferei ellas gsaid kriagt.

Jetzaddle aber uffpasst: am 2.Wochaend em Oktobr do ischt’s Moschdfeschd grad so wia früer. Do goht’s om Epfel, om da Saft ond om dia Wiesa wo des ellas wächsd. No wois mr au worom dia Schtreiobschdwiesa so wichtig send.

Z’ganze druckte Programm gibt’s ommasonschd, was für en Schwaba ja ganz wichtig ischd, glei em Museom oder uff dr haumpedsch (homepage). Des isch englisch ond hoist hald so em Komputr.

Ond nomal ebbas zom Schluss: En Beira sodschd no obedengt ens Wassr naihopfa. Von onda aus 700m kommt a hois Wassr, Thermal-Mineralwasser, also so a bissle wia hoiser Schprudel. En deam Rondomschwemmbad (Panorama-Therme) gibt’s Bekka enna ond aussa wo da romschwemma koschd ond wo drs nochher saumäßig guad goht.

Wia kommt mr no?
Mit am Zuag von Schduagard (Stuttgart) übr Nürdenga (Nürtingen) bis zom Bahhof Neuffa (Neuffen).Von do weidr mit am Bus 199 bis Beura direkt vor’s Museom.
Sonndigs ond Feirdigs: Ab Nürdenga mit am Bus 180 noch Beura (Beuren) direkt vor’s Museom.
Ond wenn da mit deim Karra (Blechkischd oder Benzinkudsch) also deim Heiliga Blechle kommscht:
Von dr Autobah A8 muaschd en Kircha-Ost (Kirchheim-Ost)raus noch Aua (Owen) ond Beura (Beuren). Am Museom ischd dann a mordsmäßg grauser koschdaloser Parkplatz.

Also gell kommad mir freuad uns uff Euch!

So hoist d’Adress:

Freilichtmuseum Beuren
In den Herbstwiesen
72660 Beuren
Telefon 0 70 25 / 9 11 90 – 90
Fax 0 70 25 / 9 11 90 – 10

Museumskass (direkt am Eigang vom Museom)
Telefon 0 70 25 / 9 11 90 – 50

Haumpedsch (homepage)
www.freilichtmuseum-beuren.de

Ihmail (E-Mail)
info@freilichtmuseum-beuren.de

Des koschted dr Aidritt ens Museom
Erwagsene zahlad: 7,00 €
Kender zahlad: 3,50 €
Mit dr ganza Familie koschts: 15,00 €

Des Museom hot fascht emmer offa
Von April bis Oktober (oder au no länger)
jeden Dag von 9.00 bis 18.00 Uhr isch offa
Aber Obacht: Mondags hot des Museom gschlossa!

Öffentliche Führong
Emmer samschtags om de drui (15.00 Uhr) gibts a koschdalose Führong durchs Museom für älle dias interessiert.

Besuchen Sie uns auf Facebook
Museumsträger
Landkreis Esslingen
Standortgemeinde
Gemeinde Beuren